Şəcərə baxımından mənə doğma olan Mirəziz Seyidzadə kimi hərtərəfli düşünmə qabiliyyətinə, yüksək təfəkkürə malik olan belə nadir şəxsiyyətlər dünyaya az-az gəlir. Onun “İslami söhbətlər” kitabı ilə tanışlıqdan aydın olur ki, nə qədər görkəmli şəxsiyyətlərlə akademik Ziya Bünyadov, fəlsəfə elmləri doktorları Zakir Məmmədov, Rafiq Əliyev, islamşünas professor Vasim Məmmədəliyev, tarix elmləri doktorları Məşhəd Nemətova, Fəridə Məmmədova və başqaları ilə o vaxtlar elmi əməkdaşlıq etmişdir.
Hacı Mirəziz Seyidzadənin mühüm xidmətlərindən biri də Baş redaktor olduğu “Kəlam” jurnalının müasir tələblər səviyyəsində forma və məzmununa görə müntəzəm çapına müvəffəq olmaqla, dinimizin fəzilətlərinin insanlara çatdırılmasında vətəndaşlıq nümayiş etdirməsi idi.
Mənəvi - əxlaqi dəyərləri dinin tələbləri səviyyəsində oxucularına təqdim edən “Kəlam” jurnalında Ulu öndər Heydər Əliyevin, onun layiqli davamçısı Prezident İlham Əliyevin və eləcə də Heydər Əliyev Fondunun prezidenti Mehriban xanım Əliyevanın Azərbaycanın dinamik inkişafı sahəsindəki əvəzolunmaz fəaliyyətlərinin davamlı olaraq təsbit olunmasını təqdir edirik. Jurnalda müntəzəm olaraq Həzrət Əlinin (ə) hikmətli kəlamlarının Hacı Mirəziz Seyidzadə tərəfindən fars və ərəb dillərindən tərcüməsinin verilməsi, “Kərbəla hadisəsinə sosial – fəlsəfi yanaşma” kimi dəyərli yazıları öz məzmununa görə məntiqi, fəlsəfi, mahiyyət daşıyır.
Hacı Mirəziz Seyidzadə “Kəlam” jurnalında “Əziz Pünhan” təxəllüsü ilə qəzəl janrında təqdim etdiyi şeirlərində klassik nümunələrə daha çox istinad etməsi mövzu seçimlərindən aydın görünür. Onu tanıyan qələm dostları istedadına həmişə yüksək dəyər vermişlər.
Seyidliyin nəcabətdən,
Alimliyin fərasətdən,
Şairliyin kəramətdən,
Mövludun mübarək olsun!
- deyən şair Arif Buzovnalının lakonik fikirləri deyilənlərə nümunə ola bilər.
Mənim Hacı Mirəziz Seyidzadə ilə şəxsi tanışlığım onun Masallı rayonunun Türkoba kəndindəki evində olmuşdur. Bunun səbəbkarı Hacı Mirəzizin uşaqlıq dostu, pedaqoji ictimaiyyətdə tanınan tədqiqatçı alim, bir yerdə çalışdığımız Şahrza Ağayev olmuşdur. O, həmişə Hacı Mirəziz Seyidzadənin elmə və elm adamlarına böyük diqqət, qayğı və hörmət göstərməsindən mənə danışmışdı. Təsadüf elə gətirdi ki, onun qonağı olduq. Saatlarla etdiyimiz söhbətdə İslam dəyərlərinin gənc nəslin əxlaq tərbiyəsində bu sahədə didaktik materialların tədrisi imkanları milli adət - ənənələrinin qorunub saxlanılması, inkişaf etdirilməsi və bir çox aktual məsələlərdən danışdıq. “İnsan dilinin altında gizlənib” kəlamı bir daha sübut etdi ki, müsahibimin nə qədər dərin biliyə, hərtərəfli mühakiməyə, sözün qüdrətini nümayiş etdirməyə, elmi dünyagörüşə malik şəxsiyyətdir.
Bu gün cismən aramızda olmayan İslam alimi Hacı Mirəziz Seyidzadənin həyat və yaradıcılığı gələcəkdə milli-mənəvi dəyər kimi öyrəniləcək və yaşadılacaqdır. Allah alim qardaşımız Hacı Mirəziz Seyidzadəyə rəhmət eləsin!
Hacı Mircəfər Həsənov
Professor