“Azərbaycanda fəaliyyət göstərən QHT-lərin maliyyə məsələləri ilə bağlı hesabat verməsi qanunvericiliyin tələbidir. QHT-lər də bu prinsipə əməl etməlidirlər”. APA-nın xəbərinə görə, bunu Azərbaycan Prezident Administrasiyası ictimai-siyasi şöbəsinin müdiri Əli Həsənov Van-İrəvan aviareysinin açılmasına münasibət bildirərkən deyib. Onun sözlərinə görə, qanunvericiliyi pozaraq hesabat verməyən, aldıqları qrantların hara xərclənməsini göstərməyən və ya qeyri-qanuni fəaliyyətlərə xərcləyən QHT-lər müvafiq qaydada məsuliyyətə cəlb olunacaqlar: “Prezident Administrasiyasının rəhbəri, akademik Ramiz Mehdiyevin son müsahibəsində bu məsələ açıq-aydın şəkildə qoyulub və bununla bağlı müvafiq orqanlar araşdırma aparırlar. Digər ölkələrin beynəlxalq təşkilatlarının Azərbaycana təzyiqlərinə gəlincə, rəsmi Bakı bu təşkilatların tələblərinə Azərbaycan dövlətinin və xalqının milli maraqlarına uyğun yanaşır. Azərbaycanın maraqları ilə üst-üstə düşən təkliflərə “hə” deyir, əməkdaşlıq edirik, uyğun gəlməyənləri isə qəbul etmirik və qəbul etmək fikrimiz də yoxdur”. Ə.Həsənov qeyd edib ki, müxtəlif təşkilatların, o cümlədən ABŞ Milli Demokratiya İnstitutunun (MDİ) Azərbaycan nümayəndəliyinin fəaliyyəti ilə bağlı mətbuatda gedən yazılardakı faktların real olub-olmaması Azərbaycan hakimiyyəti tərəfindən araşdırılacaq: “Biz mətbuatda gedən bütün məlumatları araşdırırıq. Araşdırmaların nəticəsi olaraq MDİ-nin fəaliyyətinə müvafiq qiymət veriləcək”.

+  -  Çap