Hazırda Füzuli PEŞ-də 64 min əhali yaşayır. Abonentlərin sayı isə 17 minə qədərdir. Cari ilin yanvar ayında əhali istehlakçı qrupu üzrə dəyəri dövlət vəsaiti hesabına ödənilən elektrik enerjisinin həcmi 10 milyon kilovat-saat nəzərdə tutulduğu halda, real istehlak 29 milyon kilovat-saata yaxın olub. Bu barədə məlumatı KƏLAMİNFO-ya “Azərenerji” ASC-nin mətbuat xidmətindən veriblər. Artıq rayon ərazisində məcburi köçkünlərin fərdi sayğaclaşdırma işlərinə başlanıb. Rayon ərazisində yeni salınmış Zobucuq qəsəbəsindəki 2104 evin hamısı elektron tipli sayğacla təmin edilib. Həmin qəsəbədəki abonentlərin istehlak etdiyi elektrik enerjisinin həcmi hazırda dövlət vəsaiti hesabına ödənişi nəzərdə tutulan həddi keçmir. Hər biri 200 evdən ibarət olan, ümumilikdə "Qayıdış" adlanan 11 qəsəbədə və 480 evdən ibarət "Fin qəsəbəsi"ndə sayğaclaşdırma başa çatdırılıb. Rayonun Araz, Dilağarda, Zərgər, Qarabulaq, Əhmədbəyli, Kürdmahmudlu, Alxanlı kəndləri də sayğaclaşdırılıb. Hazırda Bala Bəhmənli və Böyük Bəhmənli kəndlərində sayğaclaşdırma davam etdirilir. Əhalinin daha çox məskunlaşdığı Horadiz qəsəbəsində də bu işin sürətlə aparılması nəzərdə tutulur.

+  -  Çap