Bu gün Bakıda, Azərbaycan Jurnalist Qadınlar Assosiasiyası (AJQA) “Qazelli” Natural Kosmetika Beynəlxalq MMC ilə birlikdə təşkil etdikləri “Narkomaniyanın genefondumuza təsiri: xarici və yerli təcrübələrin öyrənilməsi” adlı elmi-praktik konfrans öz işinə başlayıb. KƏLAMİNFO xəbər verir ki, konfransda çıxış edən AJQA-nın prezidenti Sevil Yusifova son zamanlar qlobal aləmdə narkotik maddələr dövriyyəsinin çoxaldığını diqqətə çatdırıb. Azərbaycandan da bu prosesin yan keçmədiyini bildirən S.Yusifova buna əsas səbəbi son dövrlər yaxın şərqdə aramsız baş verən müharibələri göstərib. S.Yusifova narkomaniya kimi qorxulu bir bəlaya qarşı bütün dünyada olduğu kimi ölkəmizdə də birgə mübarizənin və buna qarşı qanunların gücləndirilməsini zəruri amil sayıb. O, qeyd edib ki, ölkəmizdə, xüsusən də regionlarda narkotik vasitələrin dövriyyəsi çoxalıb. Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova cəmiyyətdə narkomaniyaya qarşı mübarizəni ailədən başlamağı vacib sayıb. Onun sözlərinə görə, bu yolxucu bəlanı gənclərdə ilk olaraq valideynlər hiss edə bilirlər. Bunun üçün də mübarizəni tək hüquq mühavizə orqanlarının üzərinə buraxmağı düzgün saymayan S.Qəhrəmanova valideynəri də öz övladları üzərində güclü nəzarətə çağırıb. Millət vəkili Gövhər Baxşəliyeva isə axır zamanlar narkotik vasitələrin dövryyəsinin çoxalmasını milli genefondumuza ağır zərbə kimi dəyərləndirib. Millət vəkili 2005-ci ildə Azərbaycan qanunverici orqanı tərəfindən qəbul olunan narkotik vasitələrin və psixotrop maddələrin qanunsuz dövriyyəsi ilə bağlı qanun əsasında dövlətin bu bəlaya qarşı mübarizədə daim diqqətli olduğunu nəzərə çatdırıb. Onun sözlərinə görə, bu məslə ilə bağlı hazırda parlamentdə yeni bir qanun layihəsi də hazırlanır. Konfransda BMT-nin Azərbaycandakı rezident əlaqələndiricisi Bruno Pouezatı, millət vəkili Qənirə Paşayeva, bir çox yerli və xarici ekspertlər iştirak ediblər. Sosial reklam çarxının nümayişindən sonra konfrans öz işini davam etdirib.

+  -  Çap