Musiqili Komediya Teatrının kollektivi 2013-cü ilin ilk premyerası olaraq Fransa və Qərbi Avropa ədəbiyyatında klassik komediya janrının banisi J.B.Molyerin  вЂњSkapenin kələkləri” komediyasını təqdim edəcək. Teatrdan  verilən məlumata görə, bu komediya böyük dramaturq J.B.Molyerin Musiqili Komediya Teatrının səhnəsində oynanılan ilk əsəridir. İki hissəli tamaşanın quruluşçu rejissoru Əməkdar incəsənət xadimi, Prezident mükafatçısı Əsgər Əsgərov, ikinci rejissoru Əməkdar artist Boris Qrafkin, musiqi rəhbəri Emin Həsənov, quruluşçu rəssamı Vüsal Rahimdir.

Deyirlər ki, klassik musiqi uşaqları daha ağıllı edir, ancaq elmi  sübutlarda məsələ tam başqadır. Yəqin ki, çoxları Motsart təsiri barədə eşidib. Bu ideyaya görə guya uşaqlar, hətta körpələr Mosartın bəstələdiyi  musiqiyə qulaq asarkən daha ağılıı olur. Amma bu musiqinin sizi daha ağıllı etməsi məsələsinin elmi araşdırması heç də ürəkaçan deyil. 

Azərbaycan peşəkar teatrının 140 illik yubileyinin təsadüf etdiyi 2013-cü ildə həm də Azərbaycan Dövlət Gənc Tamaşaçılar Teatrının yaranmasının 85 ili tamam olur. Teatrdan verilən məlumata görə, bu əlamətdar yubiley təntənəli mərasimlə qeyd ediləcək. Milli Teatr Günü (10 mart) və Beynəlxalq Teatr Günü (27 mart) ərəfəsində Gənc Tamaşaçılar Teatrının yeni yaradılmış “Çardaq” səhnəsində mono və eksperimental tamaşalar da nümayiş olunacaq.

Bu il Azərbaycanda 7 teleradio şirkətinin lisenziyasının uzadılması ilə bağlı müraciətlərə baxılacaq. Bunu APA-ya Milli Televiziya  və Radio Şurasının (MTRŞ) aparat rəhbəri Toğrul Məmmədov bildirib. Onun sözlərinə görə, bunlar "SKY MAX" MMC (Ailə TV), "Baku and Boston TV Communication" MMC (B&B TV), “Azad Azərbaycan” kabel televiziyaları, ANS Müstəqil Yayım və Media Şirkəti, “Cənub” TV, “Xəzər” televiziyası və radiosu və “Aygün” TV-dir (Zaqatala).  

Azərbaycanın müxtəlif ölkələrlə dostluq münasibətlərinin daha da möhkəmlənməsinə təkan verən mədəniyyət günlərinin keçirilməsi yeni ildə də davam etdiriləcək. Mədəniyyət və Turizm Nazirliyindən verilən məlumata görə, bu istiqamətdə işlər aparılır. Bildirilir ki, azərbaycanlıların başqa xalqlara məxsus sənət inciləri ilə yaxından tanış olmalarına imkan yaratmaq məqsədilə Azərbaycanda təşkil edilən mədəniyyət günləri 2013-cü ildə də təşkil olunacaq. 

Yanvarın 3-də Amerikanın ulduz skripkaçısı Hillari Han İstanbulun məşhur Camal Reşit Rey konsert salonunda Xalq Artisti, professor Firəngiz Əlizadənin skripka və fortepiano üçün bəstələdiyi “İmpuls” əsərinin premyerasını təqdim edəcək. “İmpuls”əsərinin Braziliyada və Ekvadordakı uğurlu premyerasından təsirlənən Hillari Han əsərin müəllifi ilə müqavilənin müddətini daha iki il artırıb. O, bu əsəri 2013-2014-cü illərdə dünyanın müxtəlif ölkələrində keçirəcəyini planlaşdırdığı konsertlərdə ifa etmək niyyətindədir.

Qeyd edək ki, Hillari Han gənc olmasına baxmayaraq çox tanınan və sevilən virtuoz skripka ifaçısıdır. O, həm də italyan virtuoz skripkaçı, bəstəkar, “24 kapriz” əsərinin müəllifi Nikola Paqanininin əsərlərinin ən yaxşı ifaçısı kimi də tanınır.

“Beynəlxalq təşkilat öz qərarını qəbul edib. Belə ki, İran tərəfinin fikirlərinə qarşı müəyyən izahatlar verilib. Tar ifaçılıq sənətinin UNESKO-nun siyahısından çıxarılması mümkün deyil”. Bu fikirləri mədəniyyət və turizm naziri Əbülfəs Qarayev nazirliyinin bu gün keçirilən kollegiya iclasında deyib. 

Bu gün Akademik Milli Dram Teatrında Həsən Həsənovun “Brüsseldən məktublar” əsəri əsasında hazırladığı “Qürbətdən gələn məktublar” tamaşasının premyerası keçiriləcək. Teatrdan verilən məlumata görə, dövlət sifarişi üsulu ilə hazırlanan tamaşanın quruluşçu rejissoru Xalq artisti Mərahim Fərzəlibəyov, quruluşçu rəssamı İlham Elxanoğlu, musiqi tərtibatçısı Həmid Kazımzadədir. 

“Eurovision–2013” mahnı müsabiqəsi üçün seçim turları davam edir. Ukrayna və Albaniya öz təmsilçilərini artıq seçib. Müsabiqənin rəsmi saytının yaydığı xəbərə görə, Ukraynanı bu yarışmada Zlata Ognevich təmsil edəcək. Zlata Ognevich həm tamaşaçı, həm də münsiflərin səsverməsi ilə seçilib. 

ABŞ-ın “Trafford” nəşriyyatı “Modern Azərbaycan nəsri” adlı irihəcmli kitabı nəfis şəkildə kütləvi tirajla çap etdirib. Filologiya elmləri doktoru, professor Vaqif Sultanlı kitaba yazdığı “Ön söz”də Azərbaycan ədəbiyyatının, o cümlədən nəsrinin keçdiyi inkişaf mərhələlərindən söhbət açıb, söz sənətimizdəki yeniləşmə prosesini dünya ədəbiyyatı kontekstində şərh edib. topluda Azərbaycanın qələm sahiblərindən İsmayıl Şıxlı, İsa Muğanna, Yusif Səmədoğlu, Elçin, Anar, Aqşin Babayev və başqalarının əsərlərindən nümunələr təqdim olunub.