Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə Masallıya gedib. Səfər zamanı şeyx ötən gün vəfat edən QMİ-nin fətva şöbəsinin müdiri Hacı Mirəziz Seyidzadənin hüzr mərasimində iştirak edib və mərhum haqqında maraqlı fikirlər səsləndirib.  Hacı Allahşükür Paşazadənin Hacı Mirəziz Seyidzadə haqqında səsləndirdiyi fikirləri AzNews.az oxucularına təqdim edir: “Mirəziz Seyidzadənin ölümü Qafqaz Müsəlmanları İdarəsi və xüsusən mənim üçün böyük itkidir. İlk öncə deyim ki, mən Mirəziz Seyidzadəni itirməklə elə bil generalımı, marşalımı, sərkərdəmi itirdim. Onun vəfatı QMİ-i üçün çox böyük itkidir. M.Seyidzadə rəhbərlik etdiyim qurumun fətva şöbəsinin müdiri vəzifəsində çalışıb və öz işinə layiqincə yanaşan adam olub. Bir sözlə, Hacı Mirəziz savadlı din xadimi olmağı ilə bərabər, həm də ədəbi fəaliyyəti ilə tanınırdı, gözəl təbliğatçı idi. Mən uşaqlıq dostumu, işçimi, bir sözlə generalımı itirdim”. 

Azərbaycanın böyük İslam alimi, Qafqaz Müsəlmanları İdarəsi Fətva şöbəsinin müdiri Hacı Mirəziz Seyidzadə dünən axşam 1 saylı Şəhər Klinik Xəstəxanasında dünyasını dəyişib. Hacı Mirəziz Seyidzadənin cənazəsi doğulub boya-başa çatdığı Masallı rayonunun Türkoba kəndində dəfn olunub. Dəfn mərasimində tanınmış din xadimləri, alimlər, ziyalılar iştirak edib. 

  

Qafqaz Müsəlmanları İdarəsinin sədri Şeyxülislam Allahşükür Paşazadə mayın 8-də Küveytin Vəqflər Nazirinin birinci müavini d-r Adel əl-Fəlahı qəbul etmişdir. Qonağı səmimiyyətlə salamlayan Şeyxülislam A. Paşazadə d-r Fəlahın Azərbaycan və Küveyt xalqları arasında mənəvi əlaqələrin dərinləşməsində oynadığı rolu yüksək dəyərləndirdiyini diqqətə çatdırdı. Səmimi qardaşlıq şəraitində keçən görüşdə xalqlarımız arasında dini-mənəvi əlaqələrin daha da möhkəmləndirilməsi istiqamətində görülmüş işlər xatırlandı, gələcək üçün yeni təkliflər müzakirə olundu. QMİ sədri xüsusi vurğuladı ki, müasir dönəmdə radikallıq və ekstremizm təzahürlərinin aradan qaldırılmasının prioritet əhəmiyyət kəsb etməsini nəzərə alsaq, Adel əl-Fəlahın təbliğ etdiyi vəsətiyyə, yəni mötədil İslam xətti böyük önəm kəsb edir.

Qafqaz Müsəlmanları İdarəsinin sədri Allahşükür Paşazadə Vaşinqtonda keçirilən forumda çıxış edib.  Şeyxülislam aparılan müzakirələrin dünya miqyasında üzləşdiyimiz bəzi problemlərin, o cümlədən, terrorizm, radikalizm, ekstremizm və separatizmin aradan qaldırılması üçün dinlərarası və mədəniyyətlərarası dialoqun inkişafına xidmət edən önəmli bir hadisəyə çevrilməsini arzulayıb.  A.Paşazadə bildirib ki, Azərbaycan bütün səmavi dinlərin ardıcıllarının bir araya gəldiyi, qovuşduğu nadir məkanlardan biridir: “Mühüm mövqedə yerləşən Azərbaycanda müxtəlif etnik və dini icmalar arasında milli, irqi, dini ayrı-seçkiliyə heç bir zaman yol verilməmiş, bütün xalqlar, müxtəlif dinlərə mənsub insanlar sülh və əmin-amanlıq şəraitində yaşamışlar. 

Qafqaz Müsəlmanları İdarəsinin (QMİ) sədri, şeyxülislam Allahşükür Paşazadənin Azərbaycanın şimal rayonlarına səfəri başlayıb.  QMİ sədri bu gün öncə Şabran şəhərindəki Heydər Əliyev Mərkəzində dini icmaların rəhbərləri ilə görüşüb. A. Paşazadə daha sonra Siyəzən rayonuna səfər  edəcək. 

Görüşlər dini maarifləndirmə xarakteri daşıyır. 

Qafqaz Müsəlmanları İdarəsi tərəfindən din xadimlərinin, dindarların və ümumilikdə cəmiyyətin dini sahədə maarifləndirilməsi məqsədilə həyata keçirilən silsilə tədbirlərin davamı olaraq Mirməhəmməd Kərim Bakuvinin “Kəşfül-Həqayiq” əsərinin yeni nəşri həyata keçirilib.  Qurani-Şərifin Azərbaycan dilində təfsiri olan bu əsər üç cilddə müasir üslubda nəfis şəkildə çap edilib. Nəşrin baş məsləhətçisi QMİ sədri Şeyxülislam Allahşükür Paşazadə, redaktorları Hacı Salman Musayev, Hacı Fuad Nurullah, Əhməd Niyazov və Siracəddin Hacıdır. Kitab nəşrə Abbas Qurbanov tərəfindən hazırlanıb.