Mərhum ilahiyyatçı alim Qazi Hacı Mirəziz Seyidzadənin “Dilsuz duyğular” adlı yeni şeirlər kitabı çapdan çıxıb. AZADİNFORM xəbər verir ki, mayın 12-də ölümünün bir ili tamam olan Qazi Hacı Mirəziz Seyidzadənin “Bulud ağlamasa” və “Divan”dan sonra bədii yaradıcılığının məhsulu olan “Dilsuz duyğular” kitabı əruz və heca vəznində yazılmış müxtəlif şeir nümunələrini əhatə edir. Şairin Vətən və xalqına olan sevgisi demək olar ki, kitabın əsas sujet xəttini təşkil edir. Kitab geniş oxucu kütləsi üçün nəzərdə tutulub.

Əs-səlamu əleykum, Ağa! Bir il öncə (mayın 12-də vəfat etdin) “cənub küləyi”nin belə qəfil əsəcəyini heç gözləmirdim. Amma əsdi bu “külək”. “Küləyin” surəti iki yüz əlli km məsafə boyunca yayılıb bu yerlərə yetişincə sərin bir mehə döndü. Sənin gerçək həyata qədəm basmağınla - doğum gününlə müjdələdi məni. Beləcə, “məbdə və məad”ı xətm edib, gerçək həyata adladın. Öz təbrincə desəm, “köhnə qəmə tazə nəfəs bəxş etmək” üçün bütün arzuların fövqü olan ölümsüzlüyə qovuşdun.

Gerçək həyatındakı birinci ad günün mübarək, Ağa!