İtaliyanın Roma şəhərində İtaliya və İspaniyanın sədrliyi ilə “BMT Təhlükəsizlik Şurası islahatına yeni yanaşmalar” adlı xarici işlər nazirlərinin konfransı keçirilib. Dünyanın 70 ölkəsinin iştirak etdiyi konfransda Azərbaycanı xarici işlər naziri Elmar Məmmədyarov təmsil edib. E.Məmmədyarov öz çıxışında BMT-nin Nizamnaməsinə uyğun olaraq BMT-nin Təhlükəsizlik Şurasının beynəlxalq sülhün və təhlükəsizliyin qorunub saxlanılması üçün məsuliyyət daşıyan başlıca orqan olduğunu bildirib.

Türkiyə ziyarəti zamanı öldürülən Sara Sierranın ailəsi gənc qadının çəkdiyi fotoşəkilləri internet saytı üzərindən satışa çıxarıb. Sara Sierranın qardaşı David Jimenez satışda qısa müddət içində gənc qadının cənazəsini qarşılayacaq qədər gəlir əldə edildiyini söyləyib. Fotoşəkillərin satışının davam edəcəyi və əldə edilən gəlirin gənc qadının 9 və 11 yaşlarındakı oğulları üçün xərclənəcəyi ifadə edilib. 

Pakistanda həftə sonu başlayan və şimal seqmentlərdə davam edən şiddətli yağışlar səbəbi ilə 33 adam həyatını itirib. Ölkənin şimal-qərbi və Pəncab bölgələrində yağışlar və sel səbəbi ilə 33 adam ölüb, 40-dan çox adam isə yaralanıb.

Ən çox can itkisinin Xeybər-Paktunva əyalətində olduğu, bu ölümlərin ümumisinin torpaq damları çökməsi və selə basma səbəbi ilə reallaşdığı bildirilir.

Təhsil Nazirliyi sistemində fəaliyyət göstərən uşaq-gənclər idman və şahmat məktəblərinin yetirmələri 2012-ci ildə respublika yarışlarında, dünya birinciliyi, Avropa və dünya çempionatlarında, beynəlxalq turnirlərdə iştirak edərək yüksək nəticələr qazanıblar. Ötən il məktəblilər ümumilikdə 654 medal əldə ediblər. Onlardan 274-ü qızıl, 189-u gümüş, 191-i bürünc medaldır. 

Prezident Administrasiyası rəhbəri Ramiz Mehdiyevin Sərəncamı ilə “Muğam aləmi” Üçüncü Beynəlxalq Muğam Festivalının keçirilməsinə dair tədbirlər planı” təsdiq edilib. Sənəddə müvafiq dövlət qurumlarına festival çərçivəsində “Azərbaycan muğamlarında və Şərqin oxşar ənənəvi janrlarında musiqi alətlərinin rolu” mövzusunda Beynəlxalq elmi simpoziumun, muğamın solo və instrumental ifaları üzrə respublika və beynəlxalq müsabiqələrin təşkili və keçirilməsi ilə bağlı məsələləri həll etmək barədə müvafiq tapşırıq verilib.

İranın paytaxtı Tehranda keçirilən 31-ci “FƏCR” Beynəlxalq Teatr Festivalında beynəlxalq münsiflər heyətinin üzvü qismində iştirak edən Gənc Tamaşaçılar Teatrının rejissoru, Xalq artisti Cənnət Səlimova və teatrın aktyoru, Əməkdar artist Şövqi Hüseynov vətənə qayıdıb.

Milli Məclisin Sosial siyasət komitəsinin sədri Hadi Rəcəbli Lənkəran şəhərində gənclərlə görüşüb. Görüşdə Hadi Rəcəbli ölkəmizdə gənclərin sosial müdafiəsi ilə bağlı mövcud hüquqi baza, dövlət gənclər siyasəti, qəbul olunmuş dövlət proqramları barədə ətraflı söhbət açıb. Qeyd olunub ki, əsası ümummilli lider Heydər Əliyev tərəfindən qoyulmuş dövlət gənclər siyasəti bu gün Prezident İlham Əliyev tərəfindən uğurla davam etdirilir.

“Müxalifət olaraq Bəşər Əsədin getməsi şərti ilə siyasi həll yolunun tərəfindəyik. Verəcəyimiz tək güzəşt Bəşər Əsədin vəzifəsini tərk etməsi qarşılığında toxunulmazlığıdır. Bu mövzuda Suriya xalqını razı etməyə çalışacağıq”. Bu barədə açıqlama ilə Suriya müxalifəti və İnqilabçı Güclər Milli Koalisiyasının (SMDK) sözçüsü Vəlid əl-Bunni çıxış edib.