Azərbaycanın müxtəlif ölkələrlə dostluq münasibətlərinin daha da möhkəmlənməsinə təkan verən mədəniyyət günlərinin keçirilməsi yeni ildə də davam etdiriləcək. Mədəniyyət və Turizm Nazirliyindən verilən məlumata görə, bu istiqamətdə işlər aparılır. Bildirilir ki, azərbaycanlıların başqa xalqlara məxsus sənət inciləri ilə yaxından tanış olmalarına imkan yaratmaq məqsədilə Azərbaycanda təşkil edilən mədəniyyət günləri 2013-cü ildə də təşkil olunacaq. 

Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə dekabr ayının III ongünlüyü üçün növbəti monitorinqləri həyata keçirib. Dekabr ayının III ongünlüyündə Kür çayında suyun sərfi dekabr ayının II ongünlüyünə nisbətən 19 m3/san artaraq 159 m3/san təşkil etmişdir. 

Təhsil Nazirliyinin təşkilatçılığı ilə “1 şagird – 1 kompüter” müsabiqəsinin keçirilməsi nəzərdə tutulub. Müsabiqənin təşkil edilməsində əsas məqsəd İKT əsaslı fərdiləşmiş təhsilin formalaşdırılmasından ibarətdir. Müsabiqənin Təhsil Nazirliyinin tabeliyində olan ümumi təhsil müəssisələrinin rəhbərləri və müəllimləri arasında hər il keçirilməsi qərara alınıb. 

Ümumgürcüstan Katolikos-Patriarxı II İlyanın 80 və ali dini vəzifəyə seçilməsinin 35 illik yubileyləri mərasimində iştirak etmək üçün Gürcüstana gəlmiş Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin rəhbərlik etdiyi nümayəndə heyətinin üzvləri ümummilli lider Heydər Əliyevin Tbilisidəki büstünü ziyarət etmiş, önünə əklil qoymuşlar. Sonra QMİ-nin sədri Mirzə Fətəli Axundzadənin Tbilisidəki ev-muzeyinə baş çəkmiş, Azərbaycan Respublikasının Gürcüstandakı səfirliyinin paytaxtda inşa olunan binasında aparılan işlərlə tanış olmuşdur. Allahşükür Paşazadə Qafqaz Müsəlmanları İdarəsinin Gürcüstan nümayəndəliyinin Tbilisidəki ofisində azərbaycanlı icmasının nümayəndələri ilə görüşmüşdür. Şeyxülislam Azərbaycan Respublikasının Prezidenti İlham Əliyevin xaricdə yaşayan soydaşlara, o cümlədən Gürcüstan azərbaycanlılarına daim qayğı və diqqətini vurğulamış, ulu öndər Heydər Əliyevin siyasi kursunun varisliyə sədaqət ruhunda uğurla davam etdirildiyini bildirmişdir.

Bütün Gürcüstanın patriarxı II İlyanın 80-ci ildönümü münasibətilə Tiflisdə olan Qafqaz Müsəlmanları İdarəsinin şeyxi Hacı Allahşükür Paşazadə Gürcüstanın baş naziri Bidzina İvanişvili də görüşüb.  Gürcüstana səfər edənlər arasında Azərbaycan Milli Məclisin üzvləri də olub. Səfərin sonunda hər iki ölkənin din xadimləri bəyanat qəbul ediblər. Şeyxülislam eyni zamanda prezident İlham Əliyevin təbriklərini Gürcüstan patriarxına çatdırıb.

Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə Tbilisidə səfərdədir. Səfərin məqsədi Gürcüstan Katolikos-Patriarxı II İlyanın intronizasiyası mərasiminin 35 iliyi və anadan olmasının 80 illiyi ilə əlaqədar keçiriləcək tədbirlərdə iştirak etməkdir. Gürcüstan patriarxının ad günü ilə əlaqədar təntənəli mərasimlərin yanvarın 4-də keçirilməsi nəzərdə tutulur. 

Azərbaycan-Kıbrıs Dostluq Cəmiyyətinin İdarə Heyətinin üzvləri Türkiyənin Kiprdəki səfiri Halil İbrahim Akça ilə görüşüblər. Belə ki, AKDC İdarə Heyətinin sədri Orxan Həsənoğlu və İdarə Heyətinin üzvləri Tofiq Hüseynov, Fərid Həsənzadə və Cəfər Mənsimin iştirakı ilə baş tutan görüşdə  Türkiyənin Kiprdəki səfiri Halil İbrahim Akça AKDC fəaliyyəti ilə yaxından tanış olub və onlarla gələcək işlərində uğurlar arzulayıb. Görüş zamanı Azərbaycan gəncliyinin bu günkü durumu,  Dağlıq Qarabağ münaqişəsi və vətənpərvərlik mövzularında fikir mübadiləsi aparılıb. 

Yanvarın 3-də Amerikanın ulduz skripkaçısı Hillari Han İstanbulun məşhur Camal Reşit Rey konsert salonunda Xalq Artisti, professor Firəngiz Əlizadənin skripka və fortepiano üçün bəstələdiyi “İmpuls” əsərinin premyerasını təqdim edəcək. “İmpuls”əsərinin Braziliyada və Ekvadordakı uğurlu premyerasından təsirlənən Hillari Han əsərin müəllifi ilə müqavilənin müddətini daha iki il artırıb. O, bu əsəri 2013-2014-cü illərdə dünyanın müxtəlif ölkələrində keçirəcəyini planlaşdırdığı konsertlərdə ifa etmək niyyətindədir.

Qeyd edək ki, Hillari Han gənc olmasına baxmayaraq çox tanınan və sevilən virtuoz skripka ifaçısıdır. O, həm də italyan virtuoz skripkaçı, bəstəkar, “24 kapriz” əsərinin müəllifi Nikola Paqanininin əsərlərinin ən yaxşı ifaçısı kimi də tanınır.

Rusiya Ukrayna üçün qaz qiymətlərini endirməyəcək. ANS PRESS-in "İnterfaks"a istinadən verdiyi məlumata görə, bunu Rusiya XİN-in iqtisadi əməkdaşlıq departamentinin direktoru Aleksandr Qorban bəyan edib. "Ukraynaya qazı Belarusla eyni qiymətə satmaqla bağlı tələbələrə gəldikdə, bu, mümkün deyil. Rusiya buna getməyəcək. Nəyə görə bunu etməlidir?", - Rusiya XİN-in rəsmisi bildirib. 

Prezident İlham Əliyevin Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbriki edib: -Hörmətli xanımlar və cənablar!

Əziz həmvətənlər! Bir neçə dəqiqədən sonra 2013-cü il başlayır. 2012-ci il isə ölkəmiz üçün çox uğurlu il olmuşdur. 2012-ci ildə Azərbaycanın uğurlu, dinamik inkişafı təmin edilmişdir. Ölkə qarşısında duran bütün vəzifələr müvəffəqiyyətlə icra edilmişdir.