Tədbirə aparıcılıq edən Elçin Hüseynbəyli Hacı Mirəzizi təbrik edərək onun ədəbi mühitə töhfələrindən danışdı. Hacı Mirəziz Seyidzadə tədbirdə iştirak edənləri salamlayaraq onlara təşəkkürünü bildirdi: “Bu gün Azərbaycan xalqı Xocalı faciəsinin 22-ci ildönümünü yaşayır. Mən orda həyatını dəyişmiş insanlara Allahdan rəhmət diləyirəm”.  Daha sonra ədəbi tənqidçi Vaqif Yusifli çıxışında bildirdi ki, Hacı Mirəzizin xarakterinə, insanlığına bələd olan biriyəm: “İlk dəfə onu 1977-ci ildə yas mərasimində görmüşəm. Ona kimi isə onun haqqında gözəl sözlər eşitmişdim. O insanı dini mükəmməl səviyyədə bilən bir şəxs kimi eşitmişdim. Hacı Mirəziz bir çox dilləri bilir. Fars, ərəb dillərində mükəmməl danışır”. Hacı Mirəzizin yaradıcılığına toxunan V.Yusifli bildirdi ki, şairlik istedadla bağlıdır: “Bu gün Azərbaycanda əruzu bilən çoxdur. Amma Hacı Mirəziz kimi gözəl yazan, onun kimi tanınan şair çox azdır. 90-cı ildən başlayaraq bizdə əruz vəzninə münasibət tamamilə dəyişdi. Hacı Mirəziz həm də bir neçə monoqrafiyanın müəllifi, ilahiyyat elmləri namizədidir. Hacının yazdığı şeirləri mən mükəmməl hesab edirəm”.  Akademik BahadurTağıyev bildirdi ki, Hacı Mirəziz haqqında fikirləri rəngarəngdir: “Ona görə rəngarəngdir ki, mən onu uşaqlıq vaxtından tanıyıram. Mirəziz ruhani ailəsinin nümunəsi, Peyğəmbər nəslinin nümayəndəsidir. Onda gözəl şair əhval-ruhiyyəsi var. Bu adamların bizim cəmiyyətdə böyük rolu var. Gözəl şeirlər yazan şairlərimizin çoxu molla məktəbi qurtarıb. Molla məktəbi bitirən şairlərimiz heç də digərlərindən geri qalmır. Hacı Mirəziz özü də məktəbi Səmərqənddə bitirib. Bakıda isə müdafiə edib. Hacı Mirəziz din xadimi olaraq Azərbaycanın hər yerində tanınır”. Azərbaycan Ağsaqqallar Şurasının üzvü İmran Əbilov bildirdi ki, Mirəziz Seyidzadə öz gücünə bu günə gəlib: “Hacı Mirəziz dostumuz Allaha pənah gətirib, ucalıb. O, heç vaxt şöhrətin arxasınca qaçmayıb, şöhrət özü onu tapıb”. Qafqaz Müsəlmanları İdarəsi sədrinin müşaviri Hacı Fuad Nurullayev Mirəziz Seyidzadəyə Şeyxülislam Hacı Allahşükür Paşazadənin təbriklərini çatdırdı. Bildirdi ki, Hacı Mirəziz gözəl alim və qayğıkeş insandır. Şair Hacı Arif Buzovnalı da Mirəziz Seyidzadəyə öz arzularını çatdırdı. O, qeyd etdi ki, Hacı Mirəzizi mən uşaqlığımdan tanıyıram: “Hər bir adamın güclü dövrü onun cavanlığıdır. Son 10 ildə onun elə bir irəliləyişləri var ki, onun cavanlığını ötüb keçir. Seyidlər İlahi qüvvə sahibidirlər. O, 16 diskli bədii qiraət kimi əsər yaratdı.  Şair İsrafil Hüseynov da öz növbəsində vurğulayıb ki, Hacı Mirəziz çox gözəl din xadimidir: “Ağa necə gənclik illərində çalışırdı, yenə də elədir. Onun əsərlərinə baxanda görürük ki, yaradıcılığı rəngarəngdir. O, əsərlərində vətəninə, insanlara sevgisindən bəhs edir”. Tədbirdə Milli Dram Teatrının aktyoru İlham Əsgərov, Xalq artisti Bilal Əliyev, Hacı Mehman Fərzullayev və digərləri də Hacı Mirəziz Seyidzadəni doğum günü münasibətilə təbrik etdilər.