“Aqro Tərəqqi” İB Şuranın yardımı ilə İmişlidə layihə icrasına başlayıb
“Aqro Tərəqqi” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Kəndli-fermer təsərrüfatı subyektlərinin problemlərinin öyrənilməsi və həllinin dəstəklənməsi” mövzusunda layihənin icrasına başlayıb. Layihənin məqsədi İmişli rayonunda əhalinin sosial-iqtisadi problemlərinin öyrənilməsidir. Bu zaman əhalinin regionların sosial-iqtisadi inkişafı üzrə dövlət siyasətinə etimadını və inamını gücləndiriləcək. Həmçinin regionların sosial-iqtisadi inkişafı ilə bağlı maarifləndirmə işində vətəndaşların iştirakı təmin olunacaq, aqrar sahədə mövcud olan problemlərin həllinə qismən də çalışılacaq.
İB-dən bildiriblər ki, layihədən ümumilikdə aqrar sahədə çalışan kəndli-fermer təsərrüfatlarının subyektləri faydalanacaq. Onlar keçiriləcək görüşlərdə birbaşa iştirak etməklə yeni bilik və bacarıqlar əldə edəcəklər. Bu bacarıqlardan istifadə etməklə qarşılarına çıxan sosial-iqtisadi problemlərinin həllinə çalışacaqlar. Layihənin icrası zamanı yerli əhali dövlətin regionların sosial-iqtisadi inkişafı ilə bağlı intensiv qəbul etdiyi qərarlarla yaxından tanış olmaq imkanı da qazanacaq.