QMİ Allahşükür Paşazadənin birinci müavininin səlahiyyətlərini əlindən alması xəbərinə münasibət bildirdi
Qafqaz Müsəlmanları İdarəsi Şeyxülislam Allahşükür Paşazadənin birinci müavininin səlahiyyətlərini əlindən alması xəbərinə münasibət bildirib. QMİ bu məlumatların həqiqətə uyğun olmadığını, kimlərinsə təxəyyülünün məhsulu olduğunu vurğulayıb: “QMİ-də səlahiyyət bölğüsü məsələsində hər hansı dəyişiklik baş verməyib.
QMİ sədrinin birinci müavini Hacı Salman Musayev, İdarənin Nizamnaməsinə uyğun olaraq həm Müfti - sünni icmasının başçısı, həm də İdarə rəhbərinin birinci müavini olaraq hal-hazırda da səlahiyyətlərini yerinə yetirməkdədir. Qafqaz Müsəlmanları İdarəsində tarixən formalaşmış, İdarənin Nizamnaməsi ilə oturuşmuş və onilliklərlə özünü doğrultmuş nümunəvi idarəçilik sistemi mövcuddur. İdarə sədri Şeyxülislam və onun birinci müavini - Müfti arasında ölkə dindarlarının dini-mənəvi mənafelərinin təmini istiqamətində səmərəli əməkdaşlıq və işgüzar münasibətlər mövcuddur. QMİ daxilindəki monolitlik, heç bir zaman məzhəb ayrı-seçkiliyinin mövcud olmaması, görünür, bədxahları narahat etdiyindən təxribata getmək yolunu tutublar. Məhz bu amillə izah oluna bilər ki, QMİ-də idarədaxili kadr dəyişikliyi - iqtisadi məsələlər üzrə müşavir təyinatı QMİ sədrinin birinci müavininin səlahiyyətlərinin məhdudlaşdırılması kimi təhrifli şərh olunur. Bu faktı Azərbaycanda sünni icmasının sıxışdırılması kimi qələmə vermək cəhdləri də dini-mənəvi sabitliyimizi gözü göturməyənlərin qərəzli uydurmasından başqa bir şey deyildir”.