Davosda “SOCAR - Energy of Azerbaijan” adlı təqdimat mərasimi keçirilib
Davosda keçirilən Dünya İqtisadi Forumu çərçivəsində Azərbaycan Respublikasının Dövlət Neft Şirkəti tərəfindən rəsmi qəbul təşkil edilib. Ənənəvi olaraq keçirilən builki qəbulda “SOCAR - Energy of Azerbaijan” adlı təqdimat mərasimi təşkil olunub. ARDNŞ prezidenti Rövnəq Abdullayev Azərbaycan dövlətinin nailiyyətləri, xüsusən SOCAR-ın uğurları barədə məlumat verib. O, bildirib ki, Azərbaycanda ictimai həyatın bütün sahələrində geniş vüsət alan davamlı inkişaf insan kapitalı və həyat keyfiyyətinin durmadan yüksəldilməsi üçün zəmin yaradır.
SOCAR da bu inkişaf proseslərində yaxından iştirak edir, əzmlə çalışaraq yeni uğurlar qazanır. Avropa İttifaqının enerji məsələləri üzrə komissarı Günter Ottinger Nobel qardaşlarının Bakıdakı fəaliyyətini xatırladıb, Avropa ilə Azərbaycan arasında əlaqələrin onların xoş niyyətli fəaliyyətləri sayəsində yarandığını qeyd edib. “Bakı çox güclü təsir bağışlayan şəhərdir. Bəli, təəccüblənməyin - gərək bunu özünüz görəsiniz!”-deyən Avropa komissarı SOCAR-ın uğurlarını xüsusi qeyd edib: “Uğur sizi izləyir”.
Tədbir çərçivəsində iki memorandum imzalanıb. SOCAR və İsveçrənin MİGROS şirkəti arasında anlaşma memorandumunu ARDNŞ prezidenti Rövnəq Abdullayev və MİGROS şirkətinin direktorlar şurasının sədri Herbert Bolliger imzalayıblar. Tərəflər İsveçrənin yanacaq bazarında əməkdaşlığın daha da dərinləşdirilməsi, investisiya bazarının imkanlarının öyrənilməsi istiqamətində birgə işi davam etdirmək barədə razılığa gəliblər. Azərbaycan Respublikasının Dövlət Neft Fondu və Beynəlxalq Maliyyə Korporasiyası arasında imzalanmış memorandum isə özəl sektor sahəsində əməkdaşlığı və dünyanın inkişaf etməkdə olan bazarlarına özəl investisiyaların genişləndirilməsini nəzərdə tutur.
Qəbul zamanı “Azərbaycan - gələcəyin ölkəsidir” adlı sənədli film nümayiş olunub.
Tədbirdə bir sıra dövlətlərin rəsmi şəxsləri, nüfuzlu beynəlxalq təşkilatların və işgüzar dairələrin nümayəndələri iştirak ediblər.