“Xəzər regionunun yeni dönəminin başlandığı 1994-cü ildən bu zamana qədər Xəzərə İran və SSRİ xaric heç bir əcnəbi dövlətin və korporasiyanın ayağı dəyməyib”. “KƏLAMİNFO” xəbər verir ki, bu barədə Türkiyədə keçirilən Beynəlxalq Xəzər Forumundakı çıxışında Azərbaycan Prezident Administrasiyasının ictimai-siyasi şöbəsinin müdiri Əli Həsənov deyib.

Ə.Həsənov Xəzər regionunun siyasi, iqtisadi, geostrateji mövqeyi, dəniz ətrafı ölkələrin hazırkı durumu barədə danışıb. O bildirib ki, Xəzər regionu keçən əsrin sonu, bu əsrin əvvəlindən etibarən nəinki bölgənin, ümumilikdə dünyanın enerji təhlükəsizliyi üçün çox mühüm əhəmiyyət daşıyır: “Hazırda Xəzər regionu dünyanın ən önəmli mərkəzlərindən biridir. Ona görə də dünyanın fərqli mərkəzlərinin diqqəti bu bölgədədir”.

O bildirib ki,  1994-cü ildə Heydər Əliyevin neft strategiyası nəticəsində Xəzərə əcnəbi korporasiyalar, hövzədən kənar olan ölkələrin şirkətləri gətirilib: “Bu, çox mühüm bir geosiyasi hadisə idi. Bu o demək idi ki, Xəzər regionundakı digər ölkələr Rusiya və İrandan asılı olmadan, öz neft qaynaqlarına sahib olub, ondan müstəqil istifadə edəcəkdilər. Lakin bu qərarın həyata keçirilməsi Azərbaycana o qədər də asan başa gəlmədi. 1994-98-ci illərdə məhz bu məsələyə görə, Azərbaycana çoxlu təzyiqlər oldu, siyasi, iqtisadi, hərbi problemlərlə üzləşdik, Azərbaycanı daxildən parçalamaq üçün cəhdlər edildi. Lakin biz qərarlarımızda ardıcıl olduq və enerji qaynaqlarımıza sahibləndik”.
Daha sonra Bakı-Tiflis-Ceyhan layihəsindən danışan şöbə müdiri həmin vaxt çoxlu nativ layihələrin də olduğunu xatırladıb: “Lakin yenə də Heydər Əliyevin qətiyyəti ilə Azərbaycan özünün enerji qaynaqlarının çıxış açarını Türkiyəyə etibar etdi. Bu, təkcə iqtisadi deyil, həm də siyasi və uzaqgörən qərar idi. Əgər bu kəmər olmasaydı, İstanbul boğazında indi tanker tıxacı yaşanardı. Heydər Əliyevin Bakı-Tiflis-Ceyhan əsas ixrac kəməri ilə bağlı qərarı həm də İstanbulu böyük bir ekoloji fəlakətdən xilas etdi”.

Baxılıb: 550