Əli Abbasov Avropa Komissiyasının vitse-prezidenti Neli Krosun iddiasına cavab verdi
Hər hansı istifadəçi kiber hücuma məruz qalarsa, öz provayderinə müraciət etməlidir. “KƏLAMİNFO” xəbər verir ki, bunu rabitə və informasiya texnologiyaları naziri Əli Abbasov Avropa Komissiyasının vitse-prezidenti Neli Kros (Neelie Kroes) və onun siyasi məsələlər üzrə köməkçisinin noutbuklarının Bakıda kiber hücuma məruz qalması haqda iddialara münasibət bildirərkən deyib. “Hazırda ölkəmizdə 40-a yaxın provayder fəaliyyət göstərir” - deyən nazir bildirib ki, həmin provayderlər kiber-hücumları izləyir və nazirliyin Məlumat-Hesablama Mərkəzinə məlumat verir: “Mərkəz də həmin hücum faktını qeydə alır. Bizim provayderlərə və Məlumat-Hesablama Mərkəzinə heç bir müraciət daxil olmayıb. Biz o xanıma müraciət etmişik ki, hücumun vaxtını, kompüterin identifikasiya nömrəsini və kiber-hücum vaxtı internetdə olublarsa İP ünvanını bizə bildirsin. Biz qısa müddətdə araşdırma aparıb məsələyə aydınlıq gətirə bilərik. Lakin təəssüf ki, bizə hər hansı cavab verilməyib”.
Qeyd edək ki, Bakıda keçirilən 7-ci beynəlxalq İnternet İdarəçilik Forumunda iştirak edən Avropa Komissiyasının vitse-prezidenti N.Kros və onun siyasi məsələlər üzrə köməkçisi Rayan Hit noutbuklarının kiber-hücuma məruz qaldığını iddia ediblər.