Vüsaldan əl çəkib hicrana tələs Eşq yolu olanda dar gözəl olar
Eşqsiz, qəmzəsiz yarı neynirəm
İşvəli olanda yar, gözəl olar.
Saçları tökülsün çiyninə gur-gur
Dodaqları incə, gözləri məxmur
Boyu çinar ola bədəni billur
Üzündə də həya, ar gözəl olar.
Bir şadlıq gətirər bu qan könülə
Ağlayan bəbəklər zövqdən gülə
Təki yetişəsən o nazlı gülə
Əlinə batsa da xar, gözəl olar.
Aşiqin dar olar başına aləm
Bir günü xoş keçər bir günü matəm
Eşqə düşən bilməz cənnət, cəhənnəm
Ürəyində yansa nar gözəl olar.
Cavanlıq başqadır bal dadar zəhər
Xəyaldan seçilməz axşamla səhər
Qoca ağaclar da götürər bəhər
Amma tər fidanda bar, gözəl olar.
Mən Əziz Pünhanam duyun ay ellər
Sinəm laləzardır bitib al güllər
Cavanam nə olsun ağarıb tellər
Dağların başında qar gözəl olar.
***
Hər sözdə, şəkildə ölçü vəzm var.
Təpə çıxarmazlar dağ qabağına
Ruhi olmalıdır elmi olanın
Ölü çıxarmazlar sağ qabağına.
Düzdür bu dünyada azdır səadət
Can rahat olmasa olmazsan rahat
Əgər halal-haram bilsə camaat
Daş çəpər olmazdı bağ qabağına.
Hisləri çəkirlər dara ürəklər
Özünə vururlar yara ürəklər
Rəngə düşməsəydi qara ürəklər
Qara yaxılmazdı ağ qabağına.
Cahillər elmdən danışmasalar
Allahın işinə qarışmasalar
Haqqı gizlətməyə çalışmasalar
Ot-alaq bitməzdi tağ qabağına.
Bu Əziz Pünhanın qəddin bükməyin
Nahaqqı danışıb ətin tökməyin
Namərd ayağına onu çəkməyin
Bülbül aparmazlar zağ qabağına.
Şair Əziz Pünhan, dostu hörmətli akademik Xoşbəxt Yusifzadənin fəaliyyətlərindən ilhama gələrək yazdığı bu qəzəllə onu təbrik edir. Allah-Təaladan ona cansağlığı və uzun ömür arzulayır.
Dəhrə az-az yaranır sən təki insan, Xoşbəxt.
Çünki bu ad da deyil hər kəsə ünvan, Xoşbəxt.
Bizi xoşbəxt eləyibdir sənə dost olmağımız,
Bizə rast etdi səni xoş ki, bu dövran, Xoşbəxt.
Ócalıq şənini insana Xuda bəxş eləyir,
Səni xoşbəxt yaradıb Xaliqi-Sübhan, Xoşbəxt.
Sənin haqqında neçə ali kəlam var deyilib,
Layiqindir bu qədər şöhrətilə şan, Xoşbəxt.
Sən bilirsən yerin altında dənizlərdə nə var,
Ólu Heydər bu sözü eyləyib ünvan, Xoşbəxt.
Neft Azərbaycanı, sən nefti tanıtdın bəşərə,
Kimsə yoxdur ki, sənə olmaya heyran, Xoşbəxt.
Bu cahanda hamıya bəllidir elmin, hünərin,
Millətə ad gətiribdir belə ad-san, Xoşbəxt.
Diqqətin olmadı kəm, seyid Əziz Pünhana çün,
O da qəlbində əzizlər səni hər an, Xoşbəxt.
Hörmətli akademik Vasim Məmmədəliyevin 70 illik yubileyi munasibəti ilə dostu Əziz Pünhan yazdığı bir qəzəli ilə onu təbrik edir, Allah-Təaladan ona cansağlığı və mənalı ömür arzulayır.
Cahanda 70 ildir ömür edirsən ey cavan Vasim,
Bu azdır ya ki, çox eşq əhlinə yoxdur zaman Vasim.