Çox təəssüf edirəm ki, Məşədi Əzizbəyov o vaxt Stepan Şaumyanla Nəriman Nərimanov kimi davranmayıb, onun hərəkətlərini tənqid etməyib. KƏLAMİNFO xəbər verir ki, bu fikirləri Azərbaycan Milli Elmlər Akademiyası (AMEA) Tarix İnstitutunun direktoru, professor Yaqub Mahmudov Yeni Azərbaycan Partiyasının (YAP) qərargahında keçirilən mətbuat konfransında söyləyib. Y.Mahmudov qeyd edib ki, gərək M.Əzizbəyov Şaumyana qoşulmayaydı. Onun sözlərinə görə, ən azı o, daşnakların məhv edilməsi xəttini tutmalı idi. “Amma ondan istifadə etdilər”,-deyərək təəssüflənən Y.Mahmudov əlavə edib ki, aparılan tədqiqatlar sübut edir ki, M.Əzizbəyovu “26-lar”a beynəlmiləlçi görkəm verməkdən ötrü əlavə ediblər. “Çox təəssüf ki, Məşədi Əzizbəyov Biləsuvar, Salyan bölgəsində cəza dəstələrinə başçılıq edib və kütləvi qırğınlar həyata keçirib. Bunu sübut edən faktlar da var. “26-lar” soyqırım cəlladlarıdır. Onların ümumi abidələri, Çaparidze də daxil olmaqla digərlərinin heykəlləri götürüldü. Bunlar hamısı o deməkdir ki, Azərbaycanda bu iş artıq başlayıb. Bu, çox düzgün və cəsarətli addımdır. Güman edirəm ki, bu addımlar davam edəcək”,-deyən Y.Mahmudov tarixin keçmiş qaranlığına aydınlıq gətrib.

Baxılıb: 754