xBu gün Milli Məclisin Regional məsələlər komitəsinin iclasında bələdiyyə torpaqlarının xəritəsi məsələsi ətrafında mübahisə düşüb. “KƏLAMİNFO” xəbər verir ki, iclasda komitə üzvü, deputat Qalib Salahzadə gündəlikdəki mövzudan kənara çıxaraq irad bildirib. O, bəzi bələdiyyələrin səlahiyyətlərində olan torpaqların xəritəsinin verilməməsinə etirazını bildirib. “12 ildən çoxdur ki, Azərbaycanda bələdiyyələr fəaliyyət göstərir.

Amma bu gün Bakı ətrafında əksər bələdiyyələr hələ də bilmirlər ki, onların səlahiyyətində nə qədər və hansı torpaqlar var. Onların ərazisində olan torpaqların xəritəsi yoxdur. Bilmirlər ki, hansı torpaqlar nə qədər onların ixtiyarındadır. Amma ARDNŞ-in səlahiyyətində olan torpaqlarla bağlı xəritəsi var və buna görə də haqlı olaraq ARDNŞ əksər hallarda bələdiyyələri torpaq məsələsində ittiham edə bilir. Sonra da bələdiyyə torpaqları adı ilə həmin torpaqlarda məskunlaşan insanlarla ARDNŞ arasında ciddi mübahisələr düşür. Son günlər bütün mətbuatda ARDNŞ-lə evləri sökülən sakinlər arasında gedən toqquşmaların şahidiyik. Hamı düşür Rövnəq Abdullayevin üstünə və onu günahlandırmaq istəyirlər. Amma Rövnəq Abdullayev haqlıdır, çünki onun əlində torpağın xəritəsi var, rəsmi sənədi var. Rövnəq Abdullayev nə mənim qohumumdur, nə də yaxınımdır, deputat həmkarımdır. Sadəcə demək istəyirəm ki, belə mübahisələrin yaranmaması üçün bələdiyyələrin torpaqlarına xəritələr verilsin. Biz bu gün bu məsələni həll etməliyik. Yoxsa yığışmışıq bura Gəncə şəhərinin Kəpəz rayonunun Natəvan qəsəbəsinin adı üzərində müzakirə edib “a”-nı “ə” edirik və sair” - deyə Q.Salahzadə vurğulayıb.
Buna münasibət bildirən Komitə sədri Arif Rəhimzadə Q.Salahzadəyə gündəlikdəki məsələdən danışmağı tövsiyə edib. “Qalib müəllim, siz həmişə mənə etiraz etmək üçün nəsə tapırsınız. Bu gün əksər bələdiyyələrin xəritələri var və onlar öz ərazilərini tanıyırlar. Siz yaxşı olardı ki, məsələni ciddi araşdırasınız. O ki qaldı bəzi torpaq üstə mübahisələrə, siz özünüz də bundan əvvəl bələdiyyədə işləmisiniz. Kimsə xahiş edir, hansısa bələdiyyə kiminsə ev tikməsinə göz yumur. Məgər sizin vaxtınızda bu olmayıb?” - deyə o əlavə edib.
Q.Salahzadə yenidən öz iradlarını Arif Rəhimzadəyə bildirib və mübahisə qızışıb. Sonradan digər millət vəkillərinin məsələyə qarışması ilə məsələ səngiyib və gündəliyin müzakirəsinə keçilib.

Baxılıb: 538