Pensiyaçılara plastik kartların müvəkkil bankların şöbələri tərəfindən verilməsi daha məqsədəuyğundur. “KƏLAMİNFO” xəbər verir ki, bunu Dövlət Sosial Müdafiə Fondunun sədri Səlim Müslümov bu gün keçirdiyi mətbuat konfransında bildirib.

Fond sədrinin sözlərinə görə, pensiyaların plastik kartlar vasitəsi ilə ödənilməsi sisteminin təkmilləşdirilməsi, o cümlədən xidmətin keyfiyyətinin yaxşılaşdırılması və bu sahədə şəffaflığın daha da artırılması məqsədi ilə ölkənin bütün ödəniş təşkilatları arasında keçirilən açıq tender aprelin 4-də başa çatıb:

“Mən təəssüflə bildirirəm ki, 69 lot üzrə keçirilən tenderdə iştirak üçün hazırkı müvəkkil banklar Azərbaycan Beynəlxalq Bankı (ABB) və “KapitalBank”dan başqa cəmi üç bank – “XalqBank”, “Dəmirbank” və “Texnikabank” müraciət etdi. “XalqBank” sonradan heç bir təklif vermədiyi üçün tenderdə iştirak etmədi, “Dəmirbank”ın isə prosessinq sistemi olmadığından müraciətinə mənfi cavab verildi. “Texnikabank” iki şöbə üzrə ən aşağı qiyməti təklif etsə də, bu bankla bağlı vəziyyət ürəkaçan olmadığı üçün biz Mərkəzi Banka müraciət edib həmin şöbələr üzrə ödənişin ikinci yerdə olan banka həvalə edilməsini xahiş etdik”.
S.Müslümov bildirib ki, hazırda Bakı, Sumqayıt və Abşeron üzrə 90120 pensiyaçının kartının 5 illik istifadə müddəti başa çatıb ki, bunlardan da 76 mininə ABB xidmət göstərir: “Kütləvilik yaranıb, hamı dərhal yeni kartını almaq və pensiyasını əldə etmək istəyir, biz pensiyaçıları başa düşürük. Lakin kartların yenilənməsi prosesini insanlar həyata keçirir və müəyyən ləngimələr ola bilər. Onsuz da pensiyalar balanslara köçürülüb və pensiyaçılar kartlarını alan kimi pensiyalarını əldə edəcəklər. Bu, müvəqqəti yaranmış çətinlikdir, amma məsələ ondadır ki, biz şəffaflıq kimi daha böyük bir problemin həllinə nail oluruq”.
Fond sədrinin sözlərinə görə, Naxçıvan MR və hərbi qulluqçuları çıxmaq şərti ilə yerdə qalan pensiyaçıların 57 faizinə ABB, 43 faizinə isə “Kapitalbank” xidmət göstərir.

Baxılıb: 369