“Fevralın 8-dən etibarən bakalavrlar magistraturaya ərizə ilə müraciət edə bilərlər. “KƏLAMİNFO” xəbər verir ki, bu barədə açıqlamanı Tələbə Qəbulu üzrə Dövlət Komissiyasının (TQDK) Magistratura şöbəsinin müdiri Natiq Əliyev mətbuat konfransında verib. Onun sözlərinə görə, bakalavrlar “bakalavrın elektron ərizə forması”nı fevralın 8-dən 16-dək olan müddətdə dolduraraq fevralın 8-dən 17-dək (şənbə və bazar günləri istisna olmaqla) saat 09:00-dan 17:00-dək təsdiq etdirməlidirlər: “Elektron imzadan istifadə edən bakalavrlar istisna olmaqla, qalan bakalavrlar ərizələrini təsdiq etdirmək üçün sənəd qəbulu komissiyalarına (SQK) tələb edilən sənədlərin əslilərini şəxsən təqdim etməlidirlər. Son tədris ilinin məzunları “bakalavrın elektron ərizəsi forması”nı bitirdikləri ali təhsil müəssisəsində yaradılan SKQ-da təsdiq etdirməlidirlər. Ali məktəbləri əvvəlki illərdə bitirənlər və nəzdində SKQ fəaliyyət göstərməyən ali təhsil müəssislərinin bu ilki məzunları bakalavrın elektron ərizə formasını ali təhsil müəssisələrində yaradılan istənilən bir SKQ-da təsdiq etdirə bilmək imkanları var”.

N.Əliyev sənəd qəbulu zamanı elektron imzanın kütləvi olaraq tətbiq edilməsinin mümkün olmayacağını və yalnız elektron imzası olan bakalavrların sənəd qəbulu zamanı ondan istifadə edə biləcəklərini bildirib: “Biz elektron imzanın tətbiqi üçün müvafiq qurumlara müraciət etmişdik. Müraciətdə məqsəd bu idi ki, elektron imza daha qısa müddətə və az məbləğə verilsin. Adi qaydada elektron imzanı almaq üçün 30 manat rüsum ödənilməlidir. Amma aidiyatı qurumlar bizim təklifimizi hələ həyata keçirə bilməyəcəklər. Ona görə də kimin elektron imzası varsa, o öz ərizəsini təsdiqləyə biləcək”. N.Əliyev xarici ölkələrdə ali təhsil alan Azərbaycan vətəndaşları, əcnəbi və ya vətəndaşlığı olmayan ali təhsilli şəxslər “bakalavrın elektron ərizəsi” formasını necə təsdiq etdirilməsinə aydınlıq gətirərkən bildirib ki, bu şəxslər ərizələrini TQDK-da yaradılan SQK-ya təqdim edərək təsdiqlədə bilərlər. Qeyd edək ki, şöbə müdirinin sözlərinə görə, bu il magistraturaya ilk imtahan fevralın 26-da keçiriləcək və bakalavrlara ümumi intellekt səviyyəsinin (məntiqi təfəkkürün) yoxlanması üçün 50, xarici dil üzrə 25, informatika üzrə 25 test tapşırığı təqdim olunacaq. İmtahanlar test üsulu ilə iki mərhələdə olacaq. Hər iki mərhələdə bakalavrın hər bir test tapşırığına düzgün cavabı 1 balla qiymətləndiriləcək. Səhv cavablar düzgün cavabların nəticəsinə təsir göstərməyəcək. Birinci mərhələdəki nəticələri TQDK tərəfindən qoyulan minimal tələbləri ödəyən bakalavrlar proqram seçiminə buraxılacaqlar. Natiq Əliyev bu il magistraturaya sənəd qəbulu zamanı ilk dəfə olaraq, virtual ödəmə kartlarından istifadə ediləcəyini də bildirib: “Bu il artıq ənənəvi kağız ödəmə kartından deyil, virtual ödəmə kartlarından istifadə ediləcək. Ödəmə kartlarını virtual yolla internet ödəmə və ya SMS vasitəsilə əldə etmək mümkün olacaq. Göstərilən nömrəyə xidmət haqqı 2 manat olmaqla SMS göndərildikdən sonra iş nömrəsi və şifrə əldə ediləcək”.

Baxılıb: 355