2011-ci ildə AMEA Respublika Seysmoloji Xidmət Mərkəzi (RSXM) tərəfindən aparılan elmi tədqiqatlar iki istiqaməti əhatə edib. Bunlar respublika ərazisinin seysmikliyinin, zəlzələlərin kinemetrik və dinamik parametrlərinin öyrənilməsi və Geofiziki (maqnitometriya və qravimetriya) və geokimyəvi sahələrdəki seysmoanomal effektlərin təzahürü strukturları və xüsusiyyətlərinin kompleks tədqiqi olub. Bu barədə məlumatı “KƏLAMİNFO”ya AMEA Respublika Seysmoloji Xidmət Mərkəzindən veriblər. RSXM tərəfindən aparılan seysmoloji tədqiqatlar 31 telemetrik “Kinemetrics” (ABŞ istehsalı) stansiyasından ibarət müşahidə şəbəkəsi əsasında respublika ərazisinin seysmik rejimi, zəlzələ episentrlərinin paylanması qanunauyğunluğu, ocaq zonalarındakı seysmik proseslərin dinamikası tədqiq edilir, dərinlik qırılmalarının aktiv hissələri müəyyənləşdirilir və bu sahələrdə mümkün maksimal güclü zəlzələlərin intensivliyi qiymətləndirilir. Güclü zəlzələ ocaqlarının mexanizmi öyrənilir, böyük şəhərlərin seysmik riski qiymətləndirilir, iri tikinti obyektləri sahələrinin seysmikliyi tədqiq edilir.

Geofiziki və geokimyəvi stansiyalar şəbəkəsi vasitəsilə geomaqnit sahəsi gərginliyinin, ağırlıq qüvvəsi və qravitasiya potensialin ikinci törəməsinin variasiyaları araşdırılır. Respublikanın seysmoaktiv bölgələrində geokimyəvi sahənin hidro-, qazo- və radiokimyəvi komponentləri analiz olunur. Bu işlər seysmogen zonaların deformasiya – gərginlik vəziyyətini qiymətləndirməyə və geokimyəvi və geofiziki sahələrdə M³4.0 olan zəlzələdən öncə anomal xəbərverici effektləri aşkarlamaga imkan verir. 2011-ci ildə həmçinin AMEA RSXM-nin əməkdaşlarının 26 elmi məqalələri (o cümlədən 10 xaricdə) çap olunub. Mərkəzin əməkdaşları 7 beynəlxalq konfransda (Azərbaycan, Avstriya, Gürcüstan, Portuqaliya, Türkiyə, Özbəkistan, İordaniya, Rusiya) məruzələrlə iştirak ediblər və NATO xətti ilə Gürcüstanda treninq keçiblər. 2011-ci ildə RSXM-də 2 fəlsəfə doktorluğu üzrə iş müdafə olunub. Mərkəzimizin 2 əməkdaşı fəlsəfə doktorluğu üzrə doktoranturaya qəbul olunub. 2011-ci ildə RSXM-nin əməkdaşları NATO-nun xətti ilə 1 qrant və Elmin İnkişaf Fondu xətti ilə 2 qran layihəsində iştirak ediblər. Vladiqafqaz geofiziki-mərkəzi ilə elmi əməkdaşlıq üzrə yeni 1 beynəlxalq müqavilə bağlanıb (REA). Hazırda mərkəz 14 ölkənin seysmoloji və geofiziki institutları ilə elmi əməkdaşlıq edir. 2011-ci ildə Mərkəzimiz tərəfindən ABŞ-ın “Kinemetrics” şirkəti tərəfindən istehsal olunan cihazlarla təchiz olunmuş 6 yeni (“Ordubad”, “Heydarabad”, “Şahbuz”, “Qəbələ”, “Qobustan”, “Həzrə” ) telemetrik seysmik stansiya tikilərək istifadəyə verilib və onların sayı 31 çatdırılıb. Eləcə də RSXM tərəfindən 2011-ci ildə Azərbaycan Respublikası Nazirlər Kabinetinin tapşırığı ilə Bayıl sürüşmə sahəsində seysmoloji, mühəndisi-seysmoloji və geofiziki tədqiqatlar aparılıb və alınan nəticələr AR NK işçi qrupuna təqdim edilib.

Baxılıb: 710