Bu gün Dini Qurumlarla İş üzrə Dövlət Komitəsi (DQİDK) sədrinin yanında Məşvərət Şurasının növbəti iclası keçirilib. Bu barədə məlumatı KƏLAMİNFO-ya DQİDK-dən veriblər. Məşvərət Şurasının sədri Hidayət Orucov bildirib ki, Azərbaycan dünyəvi dövlətdir və müxtəlif din mənsubu olan vətəndaşlarının öz dini etiqadlarının sərbəst icra etməsi üçün hər cür şərait yaradan, onları qoruyan dövlətdir. Bakıda “Dinlərarası dialoq: qarşılıqlı anlaşmadan birgə əməkdaşlığa doğru” mövzusunda keçirilən Beynəlxalq konfransı xatırladan H.Orucov qeyd edib ki, Azərbaycan hökumətinin din siyasəti müsbət nəticələr verir.

Dini liderlərin ümumdünya sammitinin 2010-cu ilin aprel ayında Bakıda keçirilməsinin nəzərdə tutulduğunu vurğulayan H.Orucov tədbirin təşkili ilə bağlı Bakıda da müzakirələrin aparıldığını və hazırlıq işlərinin görüldüyünü vurğulayıb. O, “Dini etiqad azadlığı haqqında” Qanuna edilən əlavələr və dəyişiklikləri ölkədə dövlət-din münasibətləri sahəsində mühüm mərhələ kimi dəyərləndirib, dini etiqad azadlığının təmin olunması, bu sahədə stabilliyin, tolerantlığın qorunub saxlanılması və möhkəmlənməsi yönündə çox mühüm addım olduğunu qeyd edib. Qafqaz Müsəlmanları İdarəsinin sədr müavini Salman Musayev, Rus Pravoslav Kilsəsinin Bakı və Xəzəryanı Yeparxiyasının yepiskopu Aleksandr İşein, Bakı şəhəri Dağ Yəhudiləri dini icmasının sədri Semyon İxiilov, Avropa Yəhudilərinin Bakı dini icmasının sədri Gennadi Zelmanoviç, Roma Katolik Kilsəsinin Azərbaycandakı nümayəndəsi və başqalarının çıxış etdikdən sonra gündəlikdə duran digər cari məsələlər müzakirə olunub. Sonda Məşvərət Şurasının 2010-cu il üçün iş planı təsdiq edilib.

Baxılıb: 594