“Prezidentin sərəncamı ilə bu il “Turizm ili” elan olunduqdan sonra digər qurumlar kimi QHT-lər də bu işə ictimai dəstək vermək istiqamətində aktiv fəaliyyətə başlayıblar. Amma bundan əvvəl də Qeyri-Hökumət Təşkilatları turizm sahəsinin inkişaf etdirilməsi ilə əlaqədar müxtəlif layihələr həyata keçiriblər”. “KƏLAMİNFO” xəbər verir ki, bunu QHT-lərə Dövlət Dəstəyi Şurasının Icraçı Direktoru Fərasət Qurbanov deyib. Onun sözlərinə görə, turizm sahəsində təşəbbüslər şura tərəfindən daim dəstəklənib və dəstəklənməkdədir: “Məsələn, əvvəlki illərdə yaşıl turizmin inkişafına dair layihələr müsbət cavablandırılıb. Bu layihələr nəticəsində ölkənin turizm imkanları olan rayonlarında əhalinin fərdi təsərrüfatlarının imkanları öyrənilib, onların turizmə, turistlərin istirahəti və yaşaması üçün yararlı olan yerləşmə məkanları müəyyənləşib və həmin kənd evlərindən ibarət kataloq yaradılıb. Bu kataloq ictimaiyyət arasında elektron vasitələrlə yayınlanır və rayonlara səfər edən turistlər həmən yerləşmə məkanlarının xidmətlərindən istifadə edirlər. Artıq cənub regionu üzrə Astara rayonunun belə bir kataloqu hazırdır.

Eyni zamanda Şuranın dəstəyi ilə turizm obyektlərində çalışan əməkdaşlar üçün qeydiyyat prosesinin öyrədilməsinə dair təlimlər keçirilib. 2 illik ardıcıl olaraq təşkil olunan bu təlimlər nəticəsində 50-dən çox gəncin bu sahədə ixtisası artırılıb. Bundan əlavə, ölkənin şimal regionunun turizm obyektlərində çalışan gənclər üçün sosial xidmətin yaxşılaşdırılması sahəsində təlimlər keçirilib. Ümid edirik ki, QHT-lər tərəfindən həyata keçirilən bu növ təlimlər turizm xidmətinin yaxşılaşmasına, turizm sahəsində çalışan əməkdaşların peşəkarlığının artırılmasına müəyyən qədər öz töhfəsini verir. Bu il də Şura çox maraqlı bir layihəyə dəstək verib və turizm sahəsində çalışan əməkdaşlar üçün video-treninqlər layihəsi tərəfimizdən dəstəklənib. Bu layihə çərçivəsində turistin qəbul olunma mərhələsindən yola salınmasına qədər bütün prosedurları özündə əks etdirən videofilm hazırlanacaq. Həmin film xüsusi təlim ssenarisi əsasında hazırlanır. Yəni bu filmə baxan və turizm sahəsində çalışmaq arzusunda olanlar həm maariflənəcək, həm də turizmin sirlərini, onun doğru-düzgün qaydalarını mənimsəyəcəklər. Fikrimcə, bu layihənin gerçəkləşməsi ilə turizm sənayesinin nümayəndələri əvəzsiz tədris vəsaiti qazanacaqlar”.

Baxılıb: 364