DSX tərəfindən yanvar ayı ərzində 44 halda dövlət sərhədinin pozulmasının qarşısı alınıb
Azərbaycan Dövlət Sərhəd Xidməti tərəfindən yanvar ayı ərzində 44 halda dövlət sərhədinin pozulmasının qarşısı alınıb, nəticədə 85 nəfər saxlanılıb. Bu barədə məlumatı KƏLAMİNFO-ya DSX-dən veriblər.
Sərhəd rejimi qaydalarını pozduqlarına görə, 43 halda 87 nəfər saxlanılaraq barələrində müvafiq tədbirlər görülüb. Azərbaycan sərhədçiləri ötən ay ərzində axtarışda olan 79 nəfəri də saxlayıblar.
Ötən ayın 18-də Heydər Əliyev adına Beynəlxalq hava limanında "Tehran-Bakı" aviareysində 9 nəfər Əfqanıstan vətəndaşı saxta Böyük Britaniya pasportu ilə saxlanılıblar.
Yanvarın 22-də Yardımlı rayonunun Ostair kəndi yaxınlığındakı sərhəd zastavası ərazisində dövlət sərhədini pozmağa cəhd göstərərkən 5 nəfər Banqladeş vətəndaşı saxlanılıb.
Yanvarda sərhədçilər qanunsuz dövriyyədən 10 halda 62 kiloqram 423 qram narkotik maddə çıxarıblar.
Həmçinin 64 halda ümumi dəyəri 486 min 885 manat olan qaçaqmal saxlanılıb.