Bu gün “Hyatt Regency” otelində Avropa İttifaqının maliyyə dəstəyi, BMT-nin İnkişaf Proqramı və Azərbaycan hökumətinin birgə həyata keçirdiyi “Cənubi Qafqaz ölkələrində inteqrə edilmiş sərhəd sistemlərinə dəstək” layihəsinin təqdimat mərasimi keçirildi. KƏLAMİNFO xəbər verir ki, mərasimdə çıxış edən layihənin ölkə üzrə meneceri Məzahir Əfəndiyev bildirdi ki, Azərbaycan hökuməti sərhədlərin müasir səviyyədə idarəçiliyi sahəsində böyük işlər görüb. Onun sözlərinə görə, Azərbaycan bu sahədə bir sıra beynəlxalq təşkilatlarla da səmərəli əməkdaşlıq etməkdədir.

M.Əfəndiyev qeyd etdi ki, layihənin həyata keçirilməsində məqsəd sərhədlərin idarə olunması sahəsində milli qurumlararası əməkdaşlıq səviyyəsinin yüksəldilməsi, Ermənistan istisna olmaqla, qonşu sərhəd ölkələri, habelə Avropa İttifaqına üzv dövlətlər və beynəlxalq təşkilatlarla ikitərəfli və regional əməkdaşlıq səviyyəsinin artırılması, sərhədlərin təhlükəsiziliyinin təmin edilməsi və strateji idarəetmə potensialının inkişaf etdirilməsi, Azərbaycan-Gürcüstan sərhədlərində pilot proqramların həyata keçirilməsi və üstünlüklərin nümayiş etdirilməsi və digər məsələrdən ibarətdir. Avropa İttifaqının Azərbaycandakı nümayəndəliyinin əməliyyatlar bölməsinin rəhbəri Jean-Louis Lavroff bildirdi ki, təmsil etdiyi təşkilatla Azərbaycan arasında əməkdaşlıq yüksək səviyyədədir. Qloballaşan dünyada sərhəd təhlükəsizliyinin təmininin vacib məsələ olduğunu diqqətə çatdıran J.Lavroff layihənin əhəmiyyətinə toxundu. Bildirdi ki, sözügedən layihə Azərbaycanın sərhəd idarəçiliyi ilə yanaşı, sərhəd akademiyasının da idarəçiliyini dəstəkləyir. Onun sözlərinə görə, bu proqram mövcud vəziyətə uyğundur və növbəti əməkdaşlıq üçün zəmin yaradır. Dövlət Sərhəd Xidməti (DSX) rəisinin müavini, sərhəd xidməti general-mayoru Fərhad Tağızadə isə vurğuladı ki, Ermənistanın Azərbaycan torpaqlarını işğalda saxlaması bu layihənin geniş şəkildə icrasına əngəl yaradır. O, Azərbaycan sərhədinin təhlükəsizliyinin təmin olunmasında marağı olan dövlətlər və beynəlxalq təşkilatlarla milli səviyyədə əkəkdaşlığa hazır ollduğunu söylədi. Dövlət Gömrük Komitəsi (DGK) Baş idarəsinin rəisi Güloğlan Muradlı, BMT-nin Azərbaycandakı rezident əlaqələndiricisinin müavini Bahadur Ehsanov və digərləri layihənin əhəmiyyəti və görüləcək işlər barədə məlumat verdilər. Qeyd edək ki, “Cənubi Qafqaz ölkələrində inteqrə edilmiş sərhəd sistemlərinə dəstək” laiyhəsinə 6,3 mln. avro vəsait ayrılıb. Layihə 2012-ci ilədək davam edəcək.

Baxılıb: 580