Ağ bulud arasında yerə enmiş mələksən, Sən nə bəla imişsən, sən başıma kələksən. Dünya qədrini bilməz təkcə mənə gərəksən, Hicran yaman uzandı sənsiz dözə bilmirəm.
Gözlərə bax ay Allah qaşlar Aya naz eylər, İncə beli qaməti sərvi sərəfraz eylər. Şux gülüşün xoş ətrin qış ömrümü yaz eylər, Hicran yaman uzandı sənsiz dözə bilmirəm.
Nə edim ki, çatmayır əlim sənə ey pəri Artıq iki il olar çıxıb gedəndən bəri Eşq gəmimə yelkən aç qəlbimə sal löbəri Hicran yaman uzandı sənsiz dözə bilmirəm.
Sevdin məni bərmalə heç bir şeyə baxmadın Canı canıma qatdın qeyri səmtə axmadın Mənim məhəbbətimi candan əziz saxladın Hicran yaman uzandı sənsiz dözə bilmirəm.
Gülüşündə çiçək tək açıldı könlüm mənim Baxışının şöləsi qəlbə kəsildi qənim Dünyada sən var ikən sənsizlikdir məskənim Hicran yaman uzandı sənsiz dözə bilmirəm.
Sən hurimsən və ya ki göydən enən pərimsən Gündüzlər xatirəmsən gecələr dərd-sərimsən Mən bir eşq ağacıyam ən şirin bəhərimsən Hicran yaman uzandı sənsiz dözə bilmirəm.
Həsrətinə qan tökür bağlı yaram gecelər Səni xatırlayıram aram-aram gecələr Dərdimi ulduzlara pıçıldaram gecələr Hicran yaman uzandı sənsiz dözə bilmirəm.
Bu həsrətə dözüm yox Əziz Pünhan öl qurtar Bu acı məhəbbətə göz yaşınla gül qurtar Qoyma həsrətdə canı vəfalı yar gəl qurtar Hicran yaman uzandı sənsiz dözə bilmirəm.
Açılış Səhifəsi et 
Dözə bilmirəm
