Şair Əziz Pünhanın “Divanı”nı (2008) böyük məmnuniyyətlə vərəqlədim. Onun əruzun ən mürəkkəb bəhrlərində qələmə aldığı qəzəllərini məmnun-məmnun oxudum. İncə bədii zövq sahibi olduğuna bir daha inandım. Poeziya Ağanın (Mirəziz Seyidzadə) istedadının təzahür etdiyi yeganə müstəvi deyil. Mən onun elmi fəaliyyətini, ilahiyyat sahəsindəki məqalələrini, özəlliklə də bir neçə il öncə nəşr etdirdiyi “Elmin qapısı” monoqrafiyasını həvəslə mütaliə etmişəm. Həzrət Əlinin (ə) həyatına və mübarək dinimizin intişarı yolunda heç kəslə müqaisəyə gəlməyən yorulmaz fəaliyyətinə, elm sahəsindəki şücaətlərinə həsr olunmuş monoqrafiyası Hacı Mirəzizin dərin biliklərə yiyələnmiş yorulmaz tədqiqatçı olduğundan xəbər verir.
Elm və poeziya bir cüt qanaddır ki, onların vasitəsilə Qazi Hacı Mirəziz Seyidzadə (Əziz Pünhan) teologiya və poeziya sahəsində inamla irəliləyir, öz yeni uğurları ilə oxucuları sevindirir. Mən, həyatının müdrik çağına gəlib çatmış 60 yaşlı alim, şair, Elmi-Dini Şuramızın ən mötəbər üzvlərindən biri Hacı Mirəziz Seyidzadəni, ünsiyyətini yüksək məqamda tutduğum dostumu ürəkdən təbrik edir və deyirəm: Möhtərəm Qazi! Dini, elmi, ədəbi ictimaiyyət qarşısında xidmətlərin üçün çox sağ ol, müqabilində Allah özü əcrini versin! Amin!